يامن: يوووه بقا أنا زهقت
ماسه: إنت متعصب عليا ليه، أنا مقولتش حاجه غلط
يامن: وأنا كمان مقولتش حاجه غلط، فيها أي يعني لما نخرج سوا
ماسه: في إن إنت مش قادر تفهم إن إحنا لسه غربا عن بعض،انت بالنسبه لي واحد أجنبي مينفعش اخرج معاك لوحدي
يامن: أنا خطيبك!
ماسه: اديك قولت خطيبي،يعني لسه مش من محارمي ، ومش من حقك تخرج معايا دا كويس أنك بتجيلنا البيت وبنقعد لوحدنا اصلا
يامن: لا فعلا كتر خيرك.. أنا ماشي سلام
ليه مش قادر يفهم إنه واحد غريب عني، مينفعش اخرج ولا أقعد معاه لوحدي مش معني إن أي آتنين مخطوبين بيخرجوا يبقي إحنا نخرج، ماهو أنا مش هعمل حاجه حرام بحجة إن كل الناس بتعمل كدا.
إحنا عملنا حفله صغيره عشان الخطوبه ومعزمناش ناس كتير، ومرضتش اخليه يشغل اغاني، ومامته هي إللي لبستني الشبكه ، ويومها هو زعل مني وقعدت أقوله إن كل دا حرام وأني مش عايزه نبدأ علاقتنا بمعصية ربنا ، حتي أمه قعدت تتريق عليا إن يومها كنت لابسه خمار ومش حاطه ميكب،مع إن الحرام حرام في كل وقت مينفعش ابقي مبحطش ميكب واجي احطه وابين زينتي لكل الناس عشان انهرده فرحي!
ولا إني أكون لابسه خمار طول عمري ومقتنعه بيه وحباه واجي اقلعه عشان إسمي عروسه ومش هبقي عالموضه!
أنا عارفه إن يامن بيحبني وانا كمان بحبه والله بس لازم أغيره الأول لازم اخليه يحب ربنا ويطيع اوامره عشان يعرف يحبني صح ويتقي ربنا فيا
يامن: بس يا ستي الفيلم كان جامد.. لازم تشوفيه
ماسه: يعني آنتو بدل م تروحوا تصلوا جماعة.. روحتوا السينما
يامن: في أي يا ماسه منا لما روحت البيت صليت
ماسه: أنا عارفه إنك بتصلي أنا بقول لو كنت خدت أصحابك وروحتوا كلكم عشان تصلوا جماعه كنت خدت ثواب أكبر
يامن: اووف. ماسه مش كل إما أجيلك تقعدي تديني محاضرات ف الدين،أنا عارف إنك محترمه ومؤدبه ومتدينه ودا إللي عجبني فيكي،بس مش كدا متحبكيهاش يعني
ماسه: محبكهاش! هو أنا عشان بقولك روح صلي جماعه ابقي بحبكها. عشان بقولك متضيعش وقتك ع مسلسلات وافلام تافهه كل إللي بينوبك منها إنك بتاخد ذنوب وخلاص ابقي بحبكها. إحنا لو قعدنا نقول علي دا عادي وعلي دا ما كل الناس بتعمله وعلي دا نعمله مرا وآحده بس هنلاقي نفسنا غرقانين ف بحر ذنوب، وأنا مش عيزاك تكون كدا
يامن: يعني عيزاني أعمل اي
ماسه: بص يا سيدي أي رأيك لو نتفق علي ورد قرآن نقراه كل يوم صدقني القرآن هو إللي هيغير حياتك وهيطهر قلبك من أي ذنب مقيم عليه ، هيخليك إنسان تآني صدقني
ابتسم يامن: خلاص ي ستي متزعليش أنا موافق
ابتسمت ماسه: وأنا مش عيزاك تعمل كدا عشان أنا أكون راضيه،أنا عيزاك تعمل كدا عشان ربنا هو إللي يكون راضي عنك وعني
يامن: حاضر
_______________________________________
حسام: طب ما تسيبها ي عم إنت أي إللي ضربك علي أيدك
يامن: اسبها أي بس يا حسام.. أنا بحبها بس عايزها تغير طريقتها دي شويه كل حاجه تكلمني بالدين.. دي حتي مش بترضي تخرج معايا أنا أقنعتها بالعافيه إني أقعد أنا وهيا لوحدنا لما أزورهم ف البيت ومبتقوليش ولا حتي كلمه حلوه.. يعني بحبك وحشتني، انت عارف كلام المخطوبين دا.. يعني أنا مثلا بتتعامل مع خطيبتك ازاي
حسام: ههه خطيبتي أنا! ي عم دي مش بتبطل كلام معايا وهي إللي بتتحايل عليا عشان اخرج معاها مانت بتشوف صورنا ع النت كل يوم... سيبك منها ي عم دي شكلها معقده.
يامن: حساااام متكلمش عنها كدا.. أنا بدردش معاك عادي
حسام: أي يا معلم إنت قفشت ليه، أنا بنصحك بس.
يامن : انصحني من غير ما تغلط فيها.
يامن
أنا مش عايز اسييها،أنا بحبها آوي ومقتنع بيها ، أنا مش عايزها تعمل حاجه غلط بس تبقي متساهله شويه تعيش عادي زي باقي الناس، عايز أكون مبسوط وأنا معاها، وبتكلم عادي مش كل م أقول كلمه تقوم مدخله الدين وتقعد تقولي حرام وحلال... طب م صاحبي أهو هايص ومبسوط مع خطيبته وكل يوم والتاني ينزلو صورة شكل ف كذا مكان مختلف وبيروحوا سينما عادي وبيروحوا أفراح عادي.. وعايشين أهو اشمعنا أنا بس
____________________________________
يامن: سمعتي أغنية حماقي الجديده.. دي مكسره الدنيا
ماسه : يامن إنت عارف إني مش بحب اسمع أغاني عشان حرام وياريت إنت كمان تبطل تسمعها.
يامن: ي ماسه بقا مش كدا.. فيها أي يعني م الناس كلها بتسمع اغاني
ماسه : إنت عارف إني مش بحب الجمله دي،مش معني إن كل الناس بتعمل حاجه حرام إنها خلاص بقت حلال
يامن: ايوا بس يعني فيها أي أما اسمعها ، بتسلي عادي
ماسه: إنت ممكن تتسلي بانك تقعد تسمع صوت قارئك المفضل ع الفون وهو بيقرا آكتر سوره بتحبها ، ممكن تتسلي وإنت قاعد بتستغفر أو تسبح،ممكن تتسلي بانك تقعد تقرأ كتاب مفيد، اتسلي حتي وإنت بتشتغل لأني عارفه إنك بتحب شغلك فمنها أهو بتتسلي ومنها بتاخد ثواب لأن العمل عباده.
يامن: ايوا بس أنا بقالي سنين طويلة بسمع اغاني،مش هعرف أبطلها كدا مرا وآحده
ماسه : مقولتش تبطلها مرا وآحده بس دا بردو ميمنعش إنك لازم تجاهد نفسك علي قد ما تقدر، انت عارف إن كل مرا بتيجي تسمع اغنيه أي إللي بيحصل ف قلبك
يامن: اي
ماسه: قلبك دا عامل زي الوعاء والمفروض إنك بتملاه ، شوف بقا الوعاء دا تفضل تملاه طول عمرك بافلام و مسلسلات وأغاني.. تيجي بعدها تحاول تستحضر قلبك عشان تصلي بخشوع ولا تدعي دعوه نفسك تستجاب ولا تيجي تقرأ قرآن.. عايز قلبك إزاي بعد كل دا يتحرك،بعد م مليته بكل الذنوب دي ومشاعرك تتحرك مع الاغنيه دي شويه وتضحك ع الفيلم دا شويه وتتاثر بالمسلسل دا شويه وهكذا.. إنت كدا بتستنزف مشاعرك وحرفيا بتضيع نفسك.. اغلب الناس دلوقتي ف غفله كبيره ولازم يفوقوا منها قبل ما يفوت الاوان.
______________________________
يامن
ع قد ما اتضايقت إنها لسه بنفس طريقتها، ع قد ما كنت مرتاح ومبسوط آوي م إللي قالته وقعدت مع نفسي شويه وفكرت ف كلامها، أنا حاسس إني عايز اسمع كلامها بس مش عارف أو مش قادر.. في حاجه منعاني أنا مش عارفها
_______________________________
حسام: ي راااجل! كل دا عشان كنت قاعد بتسمع اغنيه
يامن: آه والله زي ما بقولك كدا
حسام: ي جدع فكك.. دا المفروض إن هي إللي تكلمك عن الأغاني وتبعتلك كمان.. دا أنا شهد خطيبتي هرياني وكل يوم لازم تسمعني أغنية شكل وننزل فيديو سوا وإحنا بنغني عشان تقعد توريه لأصحابها وعادي يعني أنا مش فاهم آنتو مقفلين اووي كدا ليه... ي عم إحنا لسه صغيرين وربنا غفور رحيم
________________________________
يامن
مبقتش عارف ولا فاهم حاجه.. حاسس إني مشتت وتايه وحيران... اسمع كلام ماسه وابتدي أغير شكل حياتي كلها.. ولا اسمع كلام حسام واكبر دماغي وزي ما قال ربنا غفور رحيم
ليه أنا إللي اسمع كلامها واعمل إللي بتقوله، طب ما تسمع هي كلامي
صوت جوايا رد عليا وقالي إن هي إللي صح... هي آه مختلفه عن كل الناس بس هي أحسن واقوي من أي حد لأنها قادره تحمي نفسها وقلبها من كل الفتن و المعاصي دي... اااه خلاص مش قادر أفكر ومش قادر أغير من نفسي، أنا ابتديت اشك أنا أصلا بحبها ولا لاء..... طب وهي؟! يا تري بتحبني ولا لاء.
___________________________________
يامن: ها أي رايك
ماسه: _____
يامن: مالك مش بتردي ليه
ماسه: هه ولو رديت عليك هيعجبك كلامي ولا هتقعد تقولي بديك محاضره ف الدين زي كل مرا
يامن : في أي يا ماسه هي دي كمان فيها حاجه
ماسه: هو إنت مفيش فايده فيك أبدا ، ميت مرا اقولك في حاجه إسمها حلال وحرام، وأنا مش مستعده اتخلي عن أخلاقي وديني ومبادئي لأي سبب مهما كان
يامن: أنا قولت أي عشان دا كله
ماسه: ماهي دي المشكله.. إنك مش شايف حاجه غلط ف إللي إنت قولته، إزاي تيجي تقولي نتصور وإحنا ماسكين أيد بعض دا أنا مرضتش اخليك تلبسني الشبكه يوم الخطوبه
يامن : أنا قولت اسيبك يومها يمكن آنتي مش واخده عليا لسه
ماسه: مش واخده عليك! يعني مش عشان حرام مثلا
وبطل تقول الجمله السخيفه بتاعة كل مرا إن كل الناس بتعمل كدا... انا ماليش دعوه بحد.. أنا اتولدت لوحدي وهموت واتحاسب لوحدي.. مش هاجي أقف بين ايدين ربنا وأقوله إن كل الناس بتعمل كدا
يامن: وطالما آنتي عارفه إن كل واحد هيتحاسب لوحده.. قاعده دلوقتي بتحاسبيني ليه ما كنت تقولي مش عايزه أتصور وخلاص
ماسه: عشان المفروض ف يوم م الايام إنك هتكون جوزي وابو ولادي والاهم من دا إني...
يامن: إنك اي؟
ماسه: ولا حاجه.. بس أعمل حسابك إنت لو فضلت ع الوضع دا مستحيل نكمل مع بعض
يامن: ماسه آنتي بتحبيني؟
ماسه: اي؟
يامن: بقولك بتحبيني ولا لاء
ماسه : م.م.من فضلك بلاش الكلام دا مش من حقي إني اجاوبك اصلا
يامن: ليييه حتي دي حرام
ماسه: آيوه حراام،المشاعر والكلام الحلو دا المفروض تكون لجوزي وبس
يامن: منا هبقي جوزك
ماسه: لما تبقي بقا وسكت شويه.. دا إذا كملنا سوا اصلا
يامن: ماشي ي ماسه براحتك
______________________________
سبع شهور! معقول كل دا يعدي وميرضاش يرجعلي.. طب ليه؟! أنا عملتلو أي ولا غلطت ف اي.. كل دا عشان كنت عايزاه إنسان تقي وناخد بإيد بعض عشان نبقي سوا ف الجنه... انا مش ندمانه ع أي حاجه قولتهاله أو عالطريقه إللي كنت بعامله بيها... أنا معملتش حاجه تغضب ربنا.. كنت عايزه حياتنا تبقي كويسه وسويه... كنت عايزه أقوله باعلي صوتي إني محبتش ف حياتي حد قده لما سألني إن كنت بحبه ولا لاء بس وأنا مراته وحلاله وكان نفسي هو كمان يكون كدا أخرته تهمه آكتر من دنيته.. قلبي موجوع منه آوي كنت فاكره إني هقدر أغيره واخليه إنسان تآني بس فشلت للأسف.
_____ __________________________ كنت نازله ع السلم عشان أروح الشغل ومرا وآحده اتكعبلت وملحقتش امسك ف حاجه.. لقيت حد مسك أيدي وشدني عشان مقعش ولقيته قدامي.. أول م اتزنت وعرفت أقف شال أيده ع طول
يامن: آنتي كويسه
ماسه: ها!.. آه أنا كويسه
"يااه قد أي وحشني صوته لسه حنين زي ما هو وابتسامته لسه تجنن زي ماهي وبقي شكله حلو آوي لما ربي دقنه.... يااادي النيله أي إللي أنا بقوله دا بس استغفر الله العظيم"
يامن: إزيك ي ماسه
ماسه: الحمد لله بخير
يامن: أنا كنت جايلكو وعايز أتكلم معاكي شويه بعد اذنك يعني
ماسه: معلش أنا مش فاضيه دلوقتي ورايا شغل
يامن: ماسه لو سمحتي اسمعيني
ماسه: اسمع اي! إحنا خلاص حكايتنا خلصت دا إنت حتي محاولتش تقولي إنها خلصت.. مشيت ع طول.. مشيت ومرجعتش تآني.. ضميرك مكنش بيوجعك لحظه وآحده ويقولك إنك ظلمتها
يامن: والله العظيم مفيش يوم عدي عليا إلا وكنت بفكر فيكي ونفسي ارجعلك... بصي في حاجات كتير اتغيرت ولازم تسمعيني
بس مش هنفضل واقفين عالسلم
ماسه: إحنا لا هنقف هنا ولا ف حته تانيه.. سبني ف حالي بقا أنا مش عايزه أشوفك تاني
ونزلت بسرعه قبل م أضعف وارضي أقعد معاه.. مش عارفه المفروض نتكلم ف اي ولا اسامحه ع أي.. كل إللي اعرفه إني مقدرش أكمل معاه وهو كدا بس هو قال إن فيه حاجات كتير اتغيرت.. يا تري قصده ع أي.... خلصت شغلي وكلمت ماما قولتلها إني هبات عند خالتي انهرده وروحت تآني يوم كنا ساعتها المغرب
فتحت باب الشقه و اتفاجئت بالصاله مليانه بوكيهات ورد كتييير وبلالين وصور ليا متعلقه وكانت متزينه بطريقه تحفه
يامن: أي رأيك.. تحفه صح؟! أكيد طبعا ملهاش حل مش أنا إللي عاملها
ماسه: إنت أي إللي جابك هنا
يامن بابتسامه: انتي
ماسه: نعم؟
يامن: الاه.. مش مراتي من حقي اجيلها ف الوقت إللي أنا عايزه
ماسه: إنت مجنون ي إبني انت
يامن: لاء أنا كنت هبقي مجنون لو كنت سيبتك تضيعي من أيدي
أنا عارف إني غلطان لما سيبتك كدا مرا وآحده بس كان لازم أقعد مع نفسي واشوف حياتي هتمشي ازاي.. زي ماتقولي كدا فترة نقاهه... كنت بفتكر كل موقف عدا علينا وكنتي بتنصحيني فيه إني معملش حاجه غلط وأنا كنت بكابر وبتريق عليكي... احتقرت نفسي اووي ساعتها وقولت ليه مكونش زيك،آنتي اقوي بنت أنا شوفتها فى حياتي، قادره تحمي نفسك من أي ذنب ف وسط كل إللي القرف إللي بقينا عايشين فيه دا... نفسك مش ضعيفه ومش بتمشي ورا شهواتك زي ناس كتير وأنا اولهم، أنا اتعلمت منك أهم درس ف حياتي،آنتي عارفه أول ما سبتك حصلتلي مشاكل كتيره ف الشغل و اترفدت.. ساعتها افتكرتك لما كنتي بتبعتيلي ادعية الفرج وسعة الرزق واذكار الصباح والمساء.. كنت بفتكر كل ليله وإنتي بتتخانقي معايا عشان مقرتش سورة الواقعه عشان توسع رزقي وتبارك فيه... وبعد م ابتديت اواظب ع كل دا الحمد لله ربنا كرمني بشغل أحسن منه بكتير، آنتي عارفه كمان إني بطلت اسمع أغاني اقسملك بالله إن حياتي اتغيرت ١٨٠ درجه بعدها... وكمان بقيت بحفظ قرآن أنا دلوقتي ف الجزء العشرين.. ههههه فاضلي عشر أجزاء وابقي حافظه زيك وهنبدأ بقا نسمع لبعض ونتسابق مين إللي هيختمه الأول... عرفت بردو إن حياتي من غير أفلام و مسلسلات عادي موقفتش بالعكس بقيت أحسن... عرفت أي هو معني الخشوع في الصلاة وأني استحضر قلبي وادعي ربنا بجد
عرفت أي لزمه ورد الاستغفار والحوقله. .. عرفت أي طعم صلاة الجماعه واني اواظب ع الخمس فروض في الجامع ، عرفت معني الصحبه الطيبه ، مش أي حد كدا وخلاص يبقي صاحبي
والصوره بانت قدامي كامله لما عرفت إن حسام صاحبي فسخ خطوبته عشان هو وخطيبته اتخانقوا خناقه كبيره وطبعا آنتي عارفه حياتهم كانت عامله إزاي.
كنت بضرب نفسي بالجزمه لما كنت بفتكر أي مرا زعلتك فيها
فهمتي بقا ليه كنت هبقا مجنون لو كنت ضيعتك من أيدي
م.م مش هقدر اقولك حاجه آكتر من كدا دلوقتي.. ممكن بعد م نكتب الكتاب
_____________________________
كل حاجة عدت ف ساعتين بالظبط بداية من ماما إللي ادتني الفستان ف أيدي وقالتلي روحي البسي بسرعه وبابا إللي لقيته فتح الباب لقرايبنا وقرايب يامن، ويامن إللي جاب المأذون ع.ع عشان يتجوزنى....
"بارك الله لكما وبارك عليكما وجمع بينكما في خير"
محستش بحاجه بعدها غير وأنا ف حضنه،كان بيحضني جامد آوي كإنه فاز بحاجه كبيره ، كنت فرحانه وبعيط وخايفه وقلقانه ومطمنه ، كل المشاعر ف نفس الوقت
يامن: ياااه... زوجتي العزيزه،كدا أقدر أكلمك وأنا مطمن
ماسه: تكلمني ف اي
يامن: ف إني بحبك ي اغلي وارق ماسه شوفتها ف حياتي، ماسه أنا..
قاطعته: يامن وربنا قلبي هيطلع من مكانه أهدا علي نفسك شويه.. ا.ا.انا لحد دلوقتي مش متصوره إني بقيت مراتك أصلا وبعدين إنت إزاي تحضني كدا قدام الناس
رفع حاحبه: امممم.. ماسه م تخلنيش اغلط فيكي وبلاش فصلان الله يكرمك.. اومال المأذون دا كان بيعمل اي
ماسه: احم طيب خلاص وسكت شويه وقولت بضحك يعني إنت طلعت بتحبني
قالي وهو بيقلد صوتي بطريقه تضحك: آيوه طلعت بحبك... بس للأسف في ناس مبتحسش
ماسه: هما مين
يامن: ما شاء الله ومبيفهموش كمان
ماسه: أنا مبسوطه آوي ي يامن إنك اتغيرت وبقيت إنسان تاني
يامن: آنتي السبب ف التغيير دا يا ماسه وبعدين عايز أسألك سؤال.. آنتي ليه مسبتنيش ع طول وليه كنتي بتقعدي تنصحيني بالرغم إني ماكنتش بسمع كلامك
ماسه: إللي بيحب حد مش ممكن أبدا يسيبه يغرق ، لازم يشده ولو بعدها حد تآني وقع التاني لازم يشده
يامن بأبتسامه: آنتي قولتي إللي اي؟
ماسه بصوت واطي: إللي بيحب حد
يامن: طب م تديني وآحده بحبك ي يامن
سكت شويه وقولتله: بحبك يا يامن
يامن: مش عارف أنا أي الجوازه دي يا بنتي بقولك قولي... ا.ا أي دا آنتي قولتي اي
ماسه: قولت بحبك
يامن: أي دااا... ابو الهول بيعرف يقول كلام حلو اهو
ماسه : أنا بتكلم بجد ، أنا أسعد إنسانه ف الدنيا ي يامن
مبسوطه إني قدرت اخليك إنسان تاني،مبسوطه إن دعوتي استجابت بأننا نتسابق ف طاعة ربنا عشان نكون سوا ف الجنه
يامن:آنتي أصلا طريقي للجنه يا ماسه
"تلاقت قلوبنا في طريق طويل.. سنسلكه سويا لنصل إلي الجنه"💜
#tokasafwat 🌸
ليست هناك تعليقات:
إرسال تعليق